Җәй күптән тәмамланды, ә менә башкаланың Идел яр буендагы Локомотив пляжы пычранып, чүп-чар белән тулып калды. Пляжның чисталыгы өчен кем җаваплы? Проблеманы хәбәрчебез өйрәнде.
Шәһәр халкының җәйге эсседә яратып кояшта кызыну, ял итү, су коену урыны булган Локомотив пляжындагы пычраклыкка шаккатырлык! Шунда ук төрле калдык, чүп-чар, пластик шешәләр, кемнәрнеңдер эчке кииемнәре, балык калдыкларына кадәр аунап ята. Ташландык төргәкләр дә бихисап.
Локомотив пляжында ял итүчеләр нинди генә адымнарга бармый: бер эскәмия янында хәтта учак та ягып җибәргәннәр. Корыган агач урынына, чи агач ботакларын да кулланганнар.
Агачлы урыннарны башка максатларда да файдаланалар икән, андый урыннар бәдрәф ролен үти. Мондагы пычраклыкны күрүчеләр башка урында, пляждан читтәрәк урнашкан яхта клубы территориясендә ял итүне, су коенуны кулай күрәләр. Анда чистарак, территорияне дә гел җыештырып, тәртипкә салып торалар. Ә менә Локомотив пляжын тәртипсезлек, хәмер куллану урыны дип саныйлар.
Локомотив пляжы-Идел буенда, федераль әһәмияттәге елгада, аның яр буен саклау полосасында урнашкан. Димәк, бу территория, закон күзлегеннән чыгып караганда, Росприроднадзор күзәтчелегенә карый. Биредә тәртипне кем күзәтә, дигән сорау белән без нәкъ менә шушы оешмага мөрәҗәгать иттек. Ләкин анда ведомство бу объект өчен җавап бирми, дип җавап бирделәр. Ә безнең заявканы Казан мэриясенә һәм Татарстан экология министрлыгына җибәрергә җыеналар. Ә менә министрлыкта бу урынны Росприроднадзор күзәтеп торырга тиеш дип ышандырдылар. Тиздән беренче кар ява, димәк территорияне быел җыештырып өлгерә алмаячаклар. Кар вакытлыча кемнеңдер җавапсызлык эзләрен генә каплаячак. Вакыйгаларның барышын күзәтеп торачакбыз.
Фәнис Мөхәммәтов, Булат Шакиев, Ленар Хәбибуллин, Татарстан яңалыклары.
