Узган уку елында ил буенча коронавируска бәйле санитар-эпидемиологик вазгыять сәбәпле, Бердәм дәүләт имтиханнары күчерелгән иде, ә Төп дәүләт имтиханы бөтенләй уздырылмады. Киләсе елга нәрсәләр фаразлана?
Россия Мәгариф министрлыгы коронавирус йогышы таралу куркынычы сәбәпле, киләсе елда Бердәм дәүләт имтиханнарын һәм Төп дәүләт имтиханнарын күчерүне әлегә планлаштырмый. Бу хакта мәгариф министры Сергей Кравцовка сылтама белән ТАСС агентлыгы хәбәр итте. Хәзер Бердәм дәүләт имтиханын һәм Төп дәүләт имтиханын уздыру өчен Мәгариф һәм фән өлкәсендә федераль күзәтчелек хезмәте белән бергә методик ярдәмлек әзерләнә. Имтиханнар уздыру көннәрен күчерү турында сүз алып барылмый. Расписание проекты буенча киләсе елда имтиханнар өч этапта узачак. Вакытыннан алда имтихан бирү этабы 22 марттан 16 апрельгә кадәр дәвам итә. Төп этап — 24 майдан 1 июльгә кадәр булачак. 3-17 сентябрьдә имтиханнарны өстәмә рәвештә тапшыру мөмкинлеге бирелә. Төп дәүләт имтиханын тапшыру расписаниесе да билгеле. Сынауларны вакытыннан алда тапшыру 20 апрельдән 14 майга кадәр, төп этап 21 майдан 1 июльгә кадәр дәвам итәр, өстәмә этап 3-22 сентябрьдә булыр дип планлаштырыла.
Өстәп шунысын да әйтик, Татарстан мәктәпләрендә укуларны онлайн форматка күчерү каралмаган. Сезонлы авырулар сәбәпле, аерым мәктәпләрнең кайбер сыйныфларында гына вакытлыча укулар туктатылган
