Казанның Урицкий исемендәге паркта күгәрченнәрнең күпләп үлү сәбәбен аңлаттылар. Якын-тирәдә яшәүчеләр парк күлендә күгәрченнәрнең үле гәүдәләрен күреп, борчуга төшкәннәр иде. Экспертлар уздырган тикшерү нәтиҗәләре нинди?Алдагы язмада Урицкий паркы канатлы дусларыбызның үлем урынына әйләнгән. Су кырыенда күгәрченнәрнең үле гәүдәләре аунап ята.
Үле күгәрченнәрнең гәүдәләрен җыеп алган булганнар. Тик алар барыбер кадрларга эләккән. Видеоязмага төшерүче һәвәскәрләр мондый хәл еш кабатлана, диләр. Кошларның күпләп үлү сәбәбе нидә? Берничә сәбәпне китерәләр. Шуларның берсе- кошлар арасында тиз таралган инфекция. Урицкий исемендәге парк канатлы дусларыбызны күптән җәлеп итә инде.
КФУның биоэкология, гигиена һәм җәмәгать сәламәтлеге кафедрасы мөдире Илгизәр Рәхимов: «менә ни өчен без хәзер коронавирус йоктыру куркынычы янаган вакытта, зур төркемнәргә җыелырга кирәкмәгәнлеген яхшы аңлыйбыз. Кошлар белән дә шундый ук хәл, алар бер урынга җыела, инфекциянең дә тизрәк таралу куркынычы арта.»
Кош гәүдәләрен төбәкара ветеринария лабораториясенә экспертизага җибәрәләр. Анда аларның үлем сәбәбен ачыклаганнар. Бәхеткә, кош гриппы расланмаган.
Төбәкара ветеринария лабораториясе сынау үзәге башлыгы Әлфия Кушлубаева: «беренче чиратта, тикшеренүләр уздырылгач, кошлар гриппы ачыкланмады. Тик Ньюкасл авыруы таралуы беленде, ул күгәрченнәрнең нерв системасына зыян сала. Өстәмә, кошларның үлүенә күп ашаулары да сәбәп булып тора. Кошлар кайдадыр күп итеп туклангач, Урицкий паркы күлендә су эчәләр. Эчтә бөртек бүртә, ризыкны эшкәртеп өлгерә алмыйлар,бу кошларның үлеменә сәбәп була.»
Үле күгәрченнәргә кагылырга ярамый — аларның кайберләре йогышлы авырулар таратучылар. Туберкулез,энцефалит һәм кош гриппы инфекцияләре булырга мөмкин.
Лилия Талипова. Дамир Мөхәммәтханов, Татарстан яңалыклары.
