Казан Кремлендә Татарстанда гражданлык җәмгыяте институтлары үсешенә өлеш керткән өчен, Татарстан Президенты премиясе лауреатларына мактау билгеләре һәм дипломнар тапшырылды. Гражданнарга 250 шәр мең сумлык өч премия, оешмаларга 400 әр мең сумлык биш премия бирелә. 2015 елдан бирле лауреат исеменә 12 җәмәгать эшлеклесе һәм 19 коммерцияле булмаган оешма лаек булган. Тантанадан хәбәрчебез репортажы.
Республика Президенты Рөстәм Миңнеханов бүләкләнүчеләргә актив гражданлык позициясе өчен зур рәхмәтен белдерде. Тантананың махсус «Татарстан Иҗтимагый палатасы турында» республиканың беренче законы кабул ителгән көнгә, 13 октябрьгә туры китереп оештырылганын искәртте.
Рөстәм Миңнеханов Татарстан Республикасы Президенты
Конкурста иҗтимагый берләшмәләрнең актив катнашуы сөендерә. Барлык лауреатлар җәмәгатьчелеккә хезмәт итүнең лаеклы үрнәге. Президент лауреатларның һәркайсына кыскача бәяләмә биреп, казанышларын атады. Татарстан мөфтиенең социаль мәсьәләләр буенча киңәшчесе, «Ярдәм» милли ислам хәйрия фонды советы рәисе Илдар Баязитов күрмәүче яки начар күрүче, шулай ук церебраль паралич диагнозы куелган инвалидларга Россиядә бердәнбер укыту-тернәкләндерү үзәген ачты. Коронавируска бәйле изоляция чорында «Тормыш юлы» акциясен оештырып, 97 мең мохтаҗ кешегә ярдәм итте. Актив иҗтимагый эше өчен Татарстан Президенты премиясе тапшырылды.
Илдар Гыйльметдинов бу бүләкнең 40 тан артык автономияне берләштергән оешманың күмәк эш нәтиҗәсе булуын билгеләп узды. Оешма татар халкы яшәгән урыннарда тел, мәдәният һәм традицияләрне саклау юнәлешендә эшли. «Татарстанның рус милли-мәдәни берләшмәсе» рус теле һәм әдәбият үсеше өлкәсендә ресурс үзәге булып тора.
Мөмкинлекләре чикле кешеләргә ярдәм итү буенча «Я СМОГУ» оешмасы рәисе Марат Ильясов белән «Татарстан ветераннары берлеге» оешмасы рәисе Әхәт Юлашевның укучылар, кадетлар белән шөгыльләнүе, егетләрне Армиягә әзерләү буенча зур эш башкаруы билгеләп үтелде. Премиягә, шулай ук, Әлмәт районы ветераннары җирле иҗтимагый оешмасы, «Чудо-дети» дәвалау педагогикасы үзәге» өстәмә белем бирү оешмасы, «НеЗаМи» балаларга һәм инвалидларга ярдәм фонды лаек булды.
Фәнис Мөхәммәтов, Сергей Павлухин, Татарстан яңалыклары.
