Коронавирус йогышы таралауга каршы чаралар көчәйтелде. Роспотребнадзор белгечләре аларның үтәлешен контрольдә тота. Узган атнада барлыгы 757 рейд үткәрелгән. Санитария кагыйдәләренең тупас бозылуы өчен 20 обьект вакытлыча ябылган. Белгечләр белән бергә рейдка безнең иҗат төркеме дә чыкты.
Битлекләр, перчаткалар, дезинфекторлар, дистанцион ара — боларның барысы да кибетләрдә һәм ваклап сату урыннарында булырга тиеш. Пандемия шартларында бик кирәкле чаралар. Аларның үтәлешен Роспотребнадзор хезмәткәрләре игътибар белән күзәтә. Чираттагы рейд барышында зур сәүдә челтәрендә хезмәткәрләрнең һәм клиентларның иминлеген саклау чараларын тикшерделәр.
Тән температурасын тикшерүдән тыш, кассаларда дезинфекция үткәрү мәҗбүри. Шулай ук товарларны бирү өчен махсус тәрәзәләр булырга тиеш. Әмма кагыйдәләр тиешенчә үтәлми. Әйтик, кулланылган битлекләрны калдыру өчен чүп савытларын сәүдә залына керткәннәр. Дистанцион ара билгеләре сызылмаган.
Бу җитешсезлекләрне тиз арада төзәтүе кыен түгел. Тик кагыйдәләр кабат бозылган, җитди кимчелекләр булган очракта, юридик затларны матди җаваплылыкка тартырга мөмкиннәр.
«Роспотребнадзор» ның ТР буенча идарәсе баш белгеч-эксперты Гөлсөяр Миңнегәрәева: «Бу администартив хокук бозулар кодексының 63 маддәсе икенче өлешенә карый. Вазыйфаи затка 50 мең сумнан алып штраф каралган.»
Роспотребнадзор белгечләре, кибетләрдән тыш, җәмәгать туклануы урыннарын да даими рәвештә тикшерәләр. Аларда шулай ук санитар куркынычсызлык чаралары үтәлергә тиеш, зал гадәттәгегә караганда 70 процент клиентны гына тутырырга тиеш. Ковид йогышы куркынычы саклана, һәркемнең җәмәгать, сәүдә урыннарында тиешле саклык чараларын үтәве бик мөһим.
Мурат Метшин, Сергей Павлухин, Татарстан яңалыклары.
