Шушы минутларда озак еллар Татарстан телевидениесендә хезмәт иткән, аның йөзе саналган Илфат Абдрахмановны соңгы юлга озаталар. 30 елдан артык гомерен яратып сайлаган хезмәтенә багышлаган Татарстанның атказанган артисты Илфат Абдрахмановның 3 октябрьдә йөрәге тибүдән туктады
Илфат Абдрахмановны тамашачы телевизор экранында 1984 елда ук күрә. Тамашачылары белән һәрвакыт «Сәламәт булыгыз!» – дип, саубуллашучы Илфат Абдрахмановка 17 ноябрьдә 59 яшь булыр иде.
Үзенчәлекле йомшак бәрхет тавышы белән бик күп тамашачының игътибарын җәлеп иткән Илфат Абдрахманов диктор булу хыялын тормышка ашыру өчен башта Казан театр училищесын тәмамлаган. Аннан конкурс аша узып телевидениедә эшли башлый. Ул теләсә нинди темаларга багышланган тапшыруларны югары дәрәҗәдә, оста алып бара иде. Алар арасында Татарстан дип аталган хәбәри мәгълүмати тапшырулар да, җырчыларның концертларын тәкъдим итүгә багышланганнары да, актуаль әңгәмәләр, тематик тапшырулар дә бар.
Дәүләт дәрәҗәсендә оештырылган рәсми тантаналар, концертларны алып бару да нәкъ менә аңа тапшырыла иде. Илфат Ибраһим улы сәхнә теле һәм актерлык осталыгы дәресләрен өйрәтүче тәҗрибәле педагог буларак та укучылары хәтерендә саклана. Соңгы елларда ул «Созвездие — Йолдызлык» фестиваленең жюириендә эшләп, бик күп балага зур сәхнәгә юллама бирде. Ә бүген аның үзен соңгы юлга озаталар. Илфат Абдрахманов Яшел Үзән зиратында җирләнәчәк. Якыннарының тирән кайгысын уртаклашабыз. Урының оҗмахда, рухың шат булсын.
