Татарстан Дәүләт Советы рәисе Фәрит Мөхәммәтшин Әлмәттә яңа техник лицейда булды, шулай ук район Советы утырышында катнашты. Ачык кабинетлар, сыйныфлардан тыш шөгыльләнү мөмкинлеге һәм башлангыч сыйныфлардан ук төгәл фәннәргә өйрәтү. Әлмәттәге «инженерлык лицее» нда заманча инновацион технологияләргә нигезләп укыталар. Нефтьчеләр башкаласындагы яңа мәктәп техник белгечләр әзерли.
Әлмәт шәһәренең инженерлык лицее директоры Зөлфия Таһирова: Беренче сыйныфтан ук информатика кебек дисциплиналар кертелде. Бишенче сыйныфтан физика, алтынчы сыйныфтан химия фәннәре укытыла. Җиденче сыйныфтан яңа фән-инженер графикасы кертелде.
Лицей «Татнефть» компаниясе инвестицияләре ярдәмендә барлыкка килде. Нефтьчеләр шәһәре киләчәктә иң алдынгы технологияләрне үзләштергән белемле кадрлар белән тулыланырга тиеш. Фәрит Мөхәммтшин лицейны яхшы яктан бәяләде. Башлангыч сыйныфта укучылар парламент рәисен хәтта кочаклап каршылады.
Парламент рәисе район Советының беренче утырышында да катнашты. Яңа сайланган депутатларга мөһим карар кабул итәргә – Әлмәт районының яңа башлыгын сайларга туры килде. Дәүләт Советы рәисе әлеге вазыйфага Рөстәм Миңнеханов исеменнән хәзерге җитәкче Тимур Нагуманов кандидатурасын тәкъдим итте.
Татарстан Республикасы Дәүләт Советы Рәисе Фәрит Мөхәммәтшин: «Президентның тәкъдимен кыю рәвештә үз өстенә алганы өчен өчен Тимур Ногумановка рәхмәт. Ул шәһәр-район проблемалары белән таныш. Үзенә хас эшлеклелек, тырышлык белән минем туган һәм сезнең шәһәрнең киләчәк үсеше өчен тиешле критерийларны табуын телим.»
Тимур Нагуманов кандидатурасы өчен күпчелек депутатлар үз тавышларын бирде. Элегрәк шәһәр Советының беренче утырышында ул Әлмәт башлыгы итеп сайланган иде.
Мурат Метшин, Эдуард Мөхәммәтҗанов, Татарстан яңалыклары, Әлмәт.
