Яңа мәктәп бусагасын атлап кергәч, кеше хокуклары буенча вәкаләтле вәкилнең директорга биргән беренче соравы. Бу сарайда кемнәр укый?
Татьяна Москалькованың сорауларына укучылар инглиз, рус һәм татар телләрендә җавап бирәләр. Мондый укыту башлангыч сыйныфлардан алып барыла.
Кунакларга мәктәпнең яңа аудиторияләрен, китапханәне, ашханәне күрсәттеләр. Республика районнарыннан килгән балалар яшәүче интернатка аерым игътибар бирелде.
Күп телле яңа Үзәктә өч меңгә якын укучы белем ала. Быел биредә алты беренче сыйныфны җыйганнар. Балалар менә шундый үтә күренмәле диварлар артында шөгыльләнә. Шуңа күрә һәркем укытучының дәресләрен ничек алып баруын карый ала.
Биредә һәр укытучы инглиз телен камил белә. Ә балалар өчен иң заманча стандартлар буенча барлык кирәкле әйберләр дә әзерләнгән.
Россия Федерациясенең кеше хокуклары буенча Вәкаләтле вәкиле Татьяна Москалькова: «Мин киләчәк мәктәбендә булдым! Биредә киләчәк кешесен әзерлиләр! Шул ук вакытта үз тарихын хөрмәт итеп, гореф-гадәтләргә өйрәтеп, өлкән буын әти-әниләренең ирешкәннәрен аңлап үсәләр. Бу тәҗрибәне башка төбәкләргә дә таратырга кирәк.»
Күп телле беренче «Адымнар” комплексы — шәһәрнең генә түгел, ә Татарстанның да горурлыгы.
Айнур Вәлиәхмәтов, Ренат Сәхибгәрәев, Татарстан яңалыклары.
