Алабугада «Ихсан» урта гомуми белем бирү мәктәбе» хосусый белем бирү учреждениесе ачылды. Әлеге белем бирү оешмасы Республика Мәгариф һәм фән министрлыгы лицензиясенә ия. Проекты 2016 елда тормышка ашырыла башлый. Бина иганәчеләрнең матди ярдәме белән өч ел эчендә сафка басты, уку кирәк-яраклары, җиһазлар, компьютер техникасы сатып алынды. Кирпечтән төзелгән бинаның мәйданы 850 квадрат метр, ул 100 укучыга исәпләнгән. Мәктәптә җылыту системасы көйләнгән, янгын куркынычсызлыгы таләпләренә тулысынча җавап бирә. Быелгы уку елында «Ихсан» мәктәбе I–IV сыйныфларга 15 бала кабул итте. Киләсе уку елына V–IX сыйныфларга да укучылар кабул итү планлаштырыла. Ул күптелле юнәлештә эшли, укучылар татар, рус, инглиз, гарәп телләрен үзләштерә.
