Бүген башкалабыз Казанда күренекле татар һәм башкорт язучысы Мостай Кәримгә һәйкәл ачыла. Тантаналы ачылышта дәүләт эшлеклеләре, киң җәмәгатьчелек катнаша. Һәйкәл башкалабызның Оренбург тракты һәм Даурия урамнары киселеше янындагы скверда урнашкан. Әлеге сквер үзе дә Мостай Кәрим исемен йөртә. Монументны Россия Рәссамнар берлеге идарәсе рәисе, скульптор, Россиянең халык рәссамы Андрей Ковальчук эшләде. Һәйкәл Урал таулары читендә утырган шагыйрь фигурасын үз эченә алган, катлаулы композициядән гыйбарәт. Аны кую турында карар бер ел элек, Башкортстанда Татарстан Көннәре кысаларында, Уфада «Нур» татар театры бинасы янында Габдулла Тукай скульптурасы ачылгач, кабул ителгән иде. Мәгълүм булганча, Мостай Кәрим Татарстан һәм Башкортстан респубикалары арасындагы татулык һәм хезмәттәшлек күперен салган олуг шәхесләребезнең берсе. Ике халыкның да уртак, олпат шагыйре. Шул уңайдан без ут күршеләребез- Башкортостандагы хезмәттәшләребез белән элемтәгә чыгабыз. Минем белән элемтәдә Флера Ишбулат кызы Мурзина. Хәерле иртә Флера! Бездә бүген Мостай Кәримгә һәйкәл ачу тантанасы бара. Уфада әдипкә һәйкәл барлыгын беләбез. Аның исемен мәңгеләштерү уңаеннан тагын нинди гамәлләр эшләнгән һәм эшләнәчәк. Безнең республика тамашачыларын шулар белән таныштырып китсәгез иде. Зур рәхмәт! Сезгә, вакыт табып безнең белән элемтәгә чыгуыгыз өчен.
