Татарстан Премьер-министры Алексей Песошин Югары Ослан районы электр челтәренең яңа подстанциясен һәм җитештерү базасын ачуда катнашты. Подстанция җитештерү объектларын үстерү өчен дә, җирле халык өчен дә уңайлы шартлар булдырырга мөмкинлек бирә. Аны төзегәндә яңа инженерлык тәҗрибәсе һәм цифрлаштыру элементлары кулланылды. Барлык операцияләр биредә эшләүчеләрнең җиһазлар белән турыдан-туры идарә итүеннән башка башкарыла. Югары Осланга керү юлында электр челтәрләренең яңа җитештерү базасы төзелде. Комплекс районның иң матур корылмаларының берсе булды. Ике катлы бинада офис бүлмәләре, беренче катта — кулланучылар белән «бер тәрәзә» принцибы буенча эшләү пункты урнашкан.
