15 августта Татарстанда «Тукай юлы» дигән шигърият фестивале башлана. Проектны Республика Велосипедчылар берлегенең инициатив төркеме оештыра.
15-29 август көннәрендә шигърият фестивале кысаларында теләгән һәркем бөек шагыйребез Габдулла Тукайның тормыш һәм иҗат юлына бәйле маршрутлар буенча экскурсиягә кушыла ала. Анда җәяүлеләр дә, шулай ук велосипедта да барырга була.
«Тукай юлы» проектының маршруты республиканың Дәрвишләр бистәсе, Дачная станциясе, Каймар, Иске Тура, Тимофеевка, Усад, Ташлы Кавал, Кушлавыч, Өчиле, Яңа Кырлай, Хәтнә, Сасна Пүчинкәсе авыллары буйлап узачак.
Фестивальнең программасы музейлар белән танышу, китапханәләрдә шигърият кичәләре үткәрү, осталык дәресләре оештыру кебек кызыклы чараларны үз эченә ала. Әйтик, проектта катнашучылар Балтач районында Тукайның әнисе каберен, Себер тракты музеен, Су тегермәнен карый ала; Арча районының Кушлавыч авылында сәяхәтчеләр Мөхәммәтгариф мулланың төзекләндерелгән утарында урнашкан шагыйрьнең әти-әнисе йорты экспозициясе белән таныша.
«Тукай юлы» проектында катнашырга теләгән һәркемне 15 августта иртәнге сәгать унда Тукайның Казандагы Әдәби музеенда көтәләр. Оештыручылар һава торышына карап киенергә киңәш итә.
