Россиядә беренче Бонд зонасы безнең республикада барлыкка килә. Июль ахырында Татарстан Президенты Рөстәм Миңнеханов аны Россия Финанс министры Антон Силуановка төзү тәкъдиме белән мөрәҗәгать иткән иде. Сүз илдә беренче Бонд склады — махсус таможня статусы булган товарлар саклана һәм таратыла торган урын турында бара. Тулырак киләсе репортажда.
«Яшел Үзән» паркы баштан ук төп «Караван юллары» киселешендә төзелде. Казанның, федераль трассаның һәм Иделнең якынлыгы әлеге территориягә бик уңайлы. Бу сәүдә компанияләренә дә җайлы. Шулай да бу Татарстанга да, тулаем Россиягә дә аз. «Яшел Үзән» паркы мөмкинлекләрен арттыру өчен, биредә Бонд зонасын булдыру турында карар кабул ителде.
Татарстанда төзелә торган беренче бонд зонасы әлегә зур төзелешне хәтерләтә. Тиздән бу территория таможня статусына ия булган товарларны саклау һәм бүлү урынына әйләнергә тиеш. Ул Интернет-сәүдәнең төп звеносы.
Перспективалар кызыклы. Гамәлдәге таможня нормаларына төзәтмәләр кертергә генә кирәк. Бу өлкәдә координаторларның яңа системасын төзү мәҗбүри.
Эшмәкәрләр хокукларын яклау буенча вәкаләтле вәкил — ТР Президенты ярдәмчесе Фәрит Габделганиев: «чит илләрдән теге яки бу товарны сатып алганда, без һәрвакыт илтеп җиткерүнең вакытын фаразлый алмыйбыз. Ә товарның бәясе 200 евродан артык булса, ул вакытта пошлинаны да түләргә туры килә. Бонд зонасы таможня пошлинасын складтан чыгарып саткан очракта гына түләргә мөмкинлек бирә.»
Шуңа күрә «Бонд кагыйдәләре» буенча эшләү отышлы. Товарны китерү, туплау, саклау, бүлү һәм сату буенча идеаль логистика системасын булдыру — икенче мөһим бурыч. Аны яңа айти-программалар ярдәмендә тормышка ашырырга була. Федераль логистика операторы ярдәм итәчәк, ул Татарстан Хөкүмәте чакыруы буенча «Яшел Үзән» сәнәгать паркына кергән.
Цифрлы логистика операторы директоры Мария Лазарева: «төп бурыч — кулланучыны сыйфатлы һәм тиз китерелә торган товар белән тәэмин итү. Моның өчен транспорт агымнарын дөрес итеп төзергә, инфраструктура белән идарә итүне дөрес оештырырга кирәк.»
Сентябрьдә үк яңа проектны сынап карау планлаштырыла. Ә ноябрьдә барысы да тиешенчә эшләп китәргә тиеш. Сәнәгать складларының гомуми мәйданы-йөз гектарга якын. Аларда 20гә кадәр компания урнаша ала.
Эшмәкәрләр хокукларын яклау буенча вәкаләтле вәкил — ТР Президенты ярдәмчесе Фәрит Габделганиев: «биредә эшләүче складларның ничек тутырылуын күрәбез. Мин икенче чиратның да үзвакытында гамәлгә ашырылачагына шикләнмим.»
Татарстанда Бонд зонасы буенча сынау проектын эшләтеп җибәрү өчен кирәкле бөтен нәрсә бар. Әзер инфраструктура, республиканың югары инновацион потенциалы һәм шунысы бик мөһим — Татарстан Хөкүмәте һәм Президенты дәрәҗәсендә карарлар тиз кабул итүнең җайга салынган системасы. Карарлар тормышка да тиз аша.
Инна Данилова, Ленар Хәбибуллин, Татарстан яңалыклары.
