Алар авылның тоткасы! Узыша-узыша эшлиләр. Актаныш районының Калмаш авылында яшәүче Исламовлар династиясенең эш стажы 125 ел!
“Авылдан башка яши алмыйм!” Исламовларның һәркайсы бу сүзләрне әйтми калмады. Әйтерсең, алдан сөйләшеп куйганнар. Ә бит бер-берсе белән аралашырга вакытлары да булмады. Фидәес абый җир эшкәртә, күпьеллык үлән басуын сөреп, көзге чәчүгә җир әзерли. Хатыны Альбина апа фермадан иртәнге эшләрен тәмамлап кайтып, бакчадагы чәчәкләре белән мәш килә. Фидәес Исламовның абыйсы Динәес тормыш иптәше Дилара апа белән печән алып кайтырга әзерләнә. Уллары Диларис Бурсык басуында, хатыны Гөлшат амбарда яңа уңышны каршы ала.
Фидәес Чалманарат мәктәбен тәмамалагач, Актаныш һөнәр училищесында укый, шофер-механизатор белгечлеге ала, армия сафларында хезмәт итә. Калмашына кайта да “Агыйдел”, хәзерге “Наратлы” хуҗалыгына эшкә килә. Шунан бирле, бер генә чәчүнең дә Фидәес Исламовтан башка үткәне юк. Тракторда җир эшкәртә, бөртек чәчә. Соңгы “тимер аты”- ”Беларус” тракторы.
Альбина апа гомере буе “Наратлы” хуҗалыгында терлекчелектә эшләгән- яшь бозаулар караган, таналар төркеме туплап, сыер да сауган. Хәзер ясалма орлыкландыру технологы.
Уңган терлекче чәчәкләр үстерергә ярата. Берничә тапкыр районкүләм “Өй алдыбыз гөлбакча” бәйгесендә мактаулы урыннар яулый. Ят чәчәкләрне каян гына җыймый ул! Мурманский шәһәрендә яшәүче кызлары орлык-үсентеләрне почта аша да җибәрәләр.
Динәес белән Дилара Исламовлар үз нигезләре янәшәсенә генә уллары Диларис белән киленнәре Гөлшат гаиләсе өчен зур йорт салып куймаслар иде. Әлбәттә, хөкүмәт ярдәме белән: 1,5 млн сум күләмендә ипотека кредиты алганнар.
Дилара апа да Калмашның хөрмәтле кешесе, 25 ел авылдашларына почта тарата.
Авылны олылап яшәгән йортта балалар да авыл җанлы булып үскән. Диларис мәктәпне тәмамлагач, ат җигеп хуҗалыкта хезмәт куя, берничә ел элек тере атны “тимер”гә алыштыра. Әтисе, абыйсы белән ничәмә-ничә тракторга яңа сулыш өреп, җан керткән Диларис хәзер хуҗалыкның ышанычлы механизаторы. Исламовлар авылның горурлыгы.
Ләйсән Газизова.
