Зур Казан боҗрасының беренче этабында соңгы эшләр бара. Биредә троллейбуслар йөри инде, тиздән трамвайлар хәрәкәте дә ачыла. Барлык кирәкле коммуникацияләр ясалып беткән. Төп эшләрне 30 нчы августка республика һәм шәһәр көненә тәмамларга исәплиләр. Теманың дәвамы киләсе репортажда.
Рельслар тоташтырыла, юл билгеләре төшерелә – Казандагы зур юл боҗрасының беренче этабы ачылуга әзер диярлек. Әле бер ел элек кенә биредә агачлар, йортлар белән әйләндереп алынган чокыр иде.
Чокырны заманча магистральгә әйләндерү өчен, төзүчеләргә ландшафтны үзгәртеп кенә калмыйча, барлык коммуникацияләрне дә күчерергә туры килгән.
«Главтатдортранс» учреждениесенең төзелеш буенча директор урынбасары Руслан Мусин: «Бу кечкенә участокта безгә коммуникацияләрне яңадан төзергә туры килде. Күргәнегезчә, барысы да яңа — су канализациясе җиһазлары, элемтә кабельләре. Монда күләмле эш башкарылды.»
Төзүчеләр эш барышында күп кенә проблемаларга юлыккан. Янәшәдә генә Югары Кабан күле, аңа якын-тирәдә күп тонналы бетон конструкцияләр төзергә кирәк була. Төзүчеләр барлык проблемаларны да хәл итәләр.
«Мосты» предприятиесе генераль директоры Ринат Мухьянов: «Кабан күле янында, грунт бик катлаулы, мең данәгә якын субай сугарга туры килде, озынлыклары 28 метр, терәк диварларына да субайлар кагып чыктык.»
Эшнең беренче этабы бетте дияргә була. Икенче этапта 1200 метрдан артык арада эшләрне үтисе бар. Биредә эшләр кызганнан-кыза, рельслар әзер.
«Главтатдортранс» учреждениесенең төзелеш буенча директор урынбасары Руслан Мусин: «Республикабыз Президенты йөкләмәсе буенча, без быел, ТАССРның 100 еллыгына трамвай хәрәкәтен дәвам итәргә ниятлибез. Беренче һәм икенче этаптан соң Авангард урамына чыгачакбыз.» Трамвай юллары 20 августка әзер булачак. Алга таба эшләтеп җибәрү эшләре башланачак. Ә менә автомобильләр хәрәкәте белән әлегә ашыкмыйлар.
Хәзер биредә гидроизоляция ясыйлар, шунда ук юл катламын җәяләр. Төзүчеләр фикеркенчә, икенче этап инде киләсе елда ук әзер булачак.
Булат Шакиев, Рәфкать Зыятдинов, Татарстан яңалыклары.
