Түбән Каманың Җәмигъ мәчете тагын да матурлана. Намаз уку залы яңа орнаментлар белән бизәлә – әлеге эшкә Казан шәһәреннән килгән рәссам алынган. Оста куллы хатын-кыз белән безнең хәбәрчебез дә очрашып, эшләре белән якыннанрак танышты.Аның нәфис куллары – намаз уку залында матурлык тудыра. Эльмира Хаҗиева үзәк мәчет диварларын татар орнаментлары белән бизи. Бу эшне башкарыр өчен рәссам Казан шәһәреннән килә. Милли бизәкләр күзләрне генә түгел, күңелләрне дә иркәләсен дип тырыша хатын-кыз. Эльмира Хаҗиева орнаментлар төшерү белән күптәннән шөгыльләнә. Аның иҗат җимешләрен балалар бакчалары һәм кафеларда күреп була. Һәр рәсеме үзенчәлекле итеп ясала. Түбән Кама Үзәк Җәмигъ мәчетендә хатын-кыз беренче тапкыр эшләми, моңа кадәр ул татар теле сыйныфын бизәгән була. Рәссамның үз куллары белән тудырган матурлыкны намаз укырга килүчеләр август башында күрә алачак – оста куллы хатын-кыз мөселман кардәшләр үзләрен өендәге кебек җылы мохиттә хис итәчәк, дип ышана. |
