Дин кардәшләребез игътибарына. Татарстанда 7 августтан намаз вакытлары үзгәрә. Бу хакта республика Диния нәзарәте матбугат хезмәте хәбәр итә.
7 августта ястү һәм аннан иртәнге намазлар быелның 5 маена кадәр гамәлдә булган вакытларда укыла башлый. Безнең төбәкнең географик үзенчәлекләрен истә тотып, шәфәкъ аклыгы иртәнге таң аклыгы белән кушыла. Төн дәвамында офыкта аклык югалмый һәм шул сәбәпле, ястү намазының вакыты керми, ә иртәнге намазның вакытын күз белән күреп билгеләп булмый.
Моны истә тотып, шулай ук ислам дине галимнәре фикерләренә таянып, намаз вакытларын сәгать ярдәмендә билгеләү турында карар кабул ителгән иде. Ястү намазы – кояш баеп сәгать ярым узганнан соң, ә “Сәхәр” вакыты һәм иртәнге намазның башы кояш чыгарга ике сәгать кала куелган иде.
Шул рәвешле, 7 августта ястү намазы вакыты соңрак, календарьдә Казан өчен бу вакыт кичке ун тулып 7минуттан соң билгеләнгән, ә 8 августта иртәнге намаз вакыты иртәрәк башлана. Календарьдә Казан өчен бу вакыт төнге беренче сигез минутта билгеләнгән.
