Татарстан президентының » Безнең ишегалды” программасын тормышка ашыру дәвам итә.Чаллыдагы 40 нчы комплекста да аны көтеп алдылар, эшләр яз айларында ук башланды. 36 ел эчендә биредә ремонт беренче тапкыр гына үткәрелә. Эшләрнең барышын Чаллыдагы хәбәрчебез дә күзәтте.
Халык белән очрашулар, фикер алышулар, проект булдыру. Җирле халык реконструкцияне озак көтте. Бүгенге көндә ремонт тәмамланган диярлек, шулай да әле кешеләрдә сораулар туа, тәкьдимнәрен җиткерергә ашыгалар. Архитекторлар белән дә киңәшләшәләр.
Архитектор Николай Сарапулов : «эшнең төрле этабында һәркемнең үз фикерләре, үз теләкләре барлыкка килә. Без яшәүчеләр белән даими элемтәдә. Проектны эшләтеп җибәрдек, көн саен шалтыратулар килә, монда нәрсә дә булса өстәгез, монда проект буенча нәрсә дә булса җитешми диләр. Бергәләп эшлибез».
Берәү 40/07 йорты янындагы юл участогын артык тар итеп ясаганнар, парковка һәм машиналар юлын тар калдырганнар, дип зарлануын җиткергән.
Хәзер бу урын тәртипкә китерелә, бордюрларны ясыйлар, тротуарга тигез итеп асфальт җәяләр.
Подряд оешмасы җитәкчесе Артем Капустин: «ишегалдын реконструкцияләү төгәлләнеп килә. Юл полотносын җәю һәм янәшәдәге территорияне төзекләндерү эшләре генә калды.»
Объектны 10 августта тапшырырга планлаштыралар. Ишегалдын төзекләндерү тәмамланып килә. Обьектны тиздән файдалануга тапшыруга ниятлиләр.
Валерия Новожилова, Сергей Вильданов, Татарстан яңалыклары, Чаллы.
