Республикада урак дәвам итә. Татарстанда 2020 нче елгы беренче миллион тонна ашлык алынган. Бөртекле һәм кузаклы культуралар 250 мең гектар мәйданда җыелган. Бу барлык мәйданнарның 17 проценты.
Авыл хуҗалыгы һәм азык-төлек министрлыгыннан хәбәр итүләренчә, республикада 1 миллион тоннадан артык ашлык суктырылган. Уртача уңыш бер гектардан 40 ярым центнер тәшкил итә. Ашлык суктыру буенча лидерлар өчлегендә — Зәй, Буа һәм Тәтеш районнары. Июль азагы һәм август башында көчле яңгырлар явуга карамастан, урып-җыю эшләре темпы кимеми. Дүрт муниципалитет хуҗалыкларында игеннәр фаразланган мәйданнарның чирегеннән артыгында җыелган. Болар — Әлки, Яшел Үзән, Нурлат һәм Зәй районнары.
