Мөселманнарның төп бәйрәмнәренең берсе булган Корбан Гаете кайчаннан бирле бәйрәм ителә? Тәрбияви чара буларак, Ислам дөньясында аның йогынтысы нинди? Хәбәрчебез кызыксынды.
Изге корбан гаете көннәре якынлаша. Бу бәйрәм барыбыз өчен дә мөһим. Ул безне сабырлыкка, Аллаһы Тагаләгә итагать кылып яшәүгә дә өйрәтә.Ә тарихы яктан Корбан Гаете кайчаннан бирле бәйрәм ителә? Тәрбияви чара буларак, Ислам дөньясында аның йогынтысы нинди?
Бөтендөнья мөселманнары төп бәйрәмнәрнең берсе Корбан яки “Гыйд әл адха” көнен билгеләп үтәргә әзерләнә. Россиядә әлеге бәйрәмне үткәрү ислам динен кабул итү чорларына ук барып тоташа. Сәяси вәзгыятькә бәйле рәвештә аның бүгенге кебек киң колач алып бәйрәм ителмәгән чаклары да булды. 1919 ел ахырында Совет властеның мөселманнарга карата мөнәсәбәтләре кискенләшә. Мәдрәсәләр ябыла, мәчетләр җимерелә, ә мөселманнар сәяси репрессияләргә дучар ителә. Нәкъ менә «Ураза бәйрәме», «Корбан гаете» көннәренә туры китереп исламга каршы массакүләм чаралар үткәрелә башлый. Татар мөселманнарына каршы оешмалар, шул исәптән «Дәхриләр» җәмгыяте тармаклана башлый. Матбугат аша да ислам дине дошман идеологиясенең бер төре буларак җиткерелә. Шуңа да карамастан, мөселманнар үз диненә ваз кичми, эзәрлекләнүләрен беләсәләр дә дин йолаларын мөмкин кадәр үтәп килергә тырыша.
Корбан бәйрәме кешеләр арасындагы барлык аерымлыкларны бетерә, аларны якынайта һәм адәм балалары арасында дуслык һәм бердәмлек хисләрен көчәйтүгә китерә. 2020 ел күп сынаулар алып килде. Пандемия белән бәйле вәзгыять рухи дөньяга да кагылып, дини тормыш рәвешенә сизелерлек үзгәрешләр кертте. Ләкин без бу сынауларны сабырлык белән кабул иттек.
Бер корбан чалу белән без аңа дүрт төрле якынаябыз дип белдерә дин әһелләре. беренче чиратта, кушканын үтәп, чалып, икенчедән, шул корбан итен ашап, өченчедән, туганнарыбыз, якыннарыбыз белән аралашып, дүртенчедән, мохтаҗларны, ятимнәрне куандырып. Корбан бәйрәме үзенә күрә Аллаһның бер бүләге.
