Коронавирус пандемиясе ял сезонына да шактый үзгәрешләр кертте. Туристларга чит илләрдә ял итү мөмкинлеге туктатылды, авиабилетларны һәм иминият акчаларын кире кайтару мәшәкате өстәлде. Казанда шушы четрекле мәсьәләләр буенча фикер алыштылар.
Россиянең көньягы иң популяр ял итү урыны. Кара диңгез яр буенда миллионынчы турист теркәлгән.
Теләүчеләрнең ялларын чит илләрдә уздыру нияте барып чыкмады. Планнарын коронавирус үзгәртте. Хәзер иң мөһиме — юлламалар өчен түләнгән акчаларны ничек кире кайтарырга?
Туристларны борчыган сорауларга кулланучылар хокукларын яклау буенча кабул итүдә җавап бирделәр. Бу хокукларны ил хөкүмәте якларга әзер — ял вакытын кичектереп торырга мөмкин.
Роспотребнадзор белгечләре өлкәннәргә сәфәргә чыгуны кичектерүне тәкьдим итте.
Россия беренче августтан халыкара авиаэлемтәне яңарта. Беренче самолетлар Бөекбритания, Төркия һәм Танзаниягә очачак.
Мөстәкыйль туристларга билетларны авиакомпанияләрнең рәсми сайтларында сатып алырга киңәш итәләр. Рейс туктатылган очракта, билет бәясе кире кайтарылачак һәм шул ук суммага очышның икенче көнен тәкъдим итәчәкләр.
Алмаз Хәкимов, Владимир Юрков.
