Татарстан президенты Рөстәм Миңнеханов инициативасы белән башланган “Безнең ишегалды” программасы, тулы куәтенә үз эшен дәвам итә. Эшләр республикабызның зур шәһәрләрдә генә түгел, ә район үзәкләрендә һәм бистәләрдә дә актив рәвештә бара. Актаныш районыннан-безнең репортаж.
Актанышның 1 нче кварталында 15 йорт. Шуларның унөче күп еллар элек салынган. Ишегалларындагы төзексезлек яшәүчеләрне күптәннән борчый иде. Балалар мәйданчыклары ясау, кер элгечләр, йорт яннарына утыргычлар, чүп чиләкләре кую – һәммәсе буенча да фатир хуҗалары тәкъдим керткән. Район башлыгы Энгель Фәттахов җитәкчелегендә узган очрашуларда алар, өстәп, үзләренең сорау-тәкъдимнәрен дә җиткергәннәр иде.
Төзүчеләр эшкә керешкәч тә, район җитәкчесе һәр йорт буенча кергән тәкъдимнәрнең үтәлеше белән танышты, йортта яшәүчеләрнең фикерләрен тыңлады. Беренче квартал Татарстан Президенты Рөстәм Миңнеханов программасы буенча Актаныш районында төзекләндерелүче беренче ишегалды.
2024 елга кадәр “Безнең ишегалды” программасы нигезендә Актанышта күпфатирлы йортлар урнашкан барлык кварталлар да төзекләндереләчәк. Уңайлы мохит булдыруда халык тарафыннан әйтелгән барлык тәкьдимнәр дә исәпкә алыначак.
Ләйсән Газизова.
