Быел Алабугада яшәүче бакчачы Валерий Тукмачев бер килограммга якын паваырлыктагы помидорлар үстергән. Уңыш рекордлы булырга охшаган, дип уртаклашты ул безнең белән. Эшмәкәр үз теплицасында барлыгы 1700 төп томат үстерә.
Валерий Тукмачев теләсә кемне сокландырырлык һәм яхшы мәгьнәдә көнләштерерлек кызарып пешкән помидорларны июньнән бирле җыя инде. Атна саен бер тоннадан артык томат җыеп сата. Шул ук вакытта фермер башкалардан аерым технологияләрне кулланмый – үсемлекләрне тукландыра, вакытында суын сибә.
Эшмәкәр Валерий Тукмачев: «алдагы елларда суны кулдан сибә идем, хәзер тамчылап су сибүне көйләдем. Тамырларга су төшүне контрольдә тотам, барысын да бер тәртипкә салдым.»
Нәтиҗә дә күз алдында: һәр помидолрның авырлыгы 800-900 граммга җитә. “Минем белән бергә масса җыялар», — дип шаярта фермер. Быелгы сезонны ул соңгы биш елда иң уңышлысы дип саный. Хәзер Валерий бер гектар ярым җирдә 1700 төп томат үстерә. Эш көне иртәнге сәгать биштә башлана. Кайчагында арыса да, яратып шөгыльләнә, кешеләр рәхмәтен ишетү рәхәт ди.
Валерий Тукмачев: «Рәхмәт әйтәләр. Шул рәхмәтләрне бергә җыйсаң, мин чынлап та миллионер, бай кеше. Миллионнарым булмаса да, мин бай кеше дип саныйм үземне. «
Гөлназ Гайни, Ренат Гыйниятов, Татарстан яңалыклары, Алабуга районы.
