Быел «Мәдәният» илкүләм проекты буенча Татарстанның 18 белем бирү учреждениесендә капиталь ремонт үткәрү мөмкинлеге булачак. Шул исәптән: 17 балалар сәнгать мәктәбендә һәм Фәрит Яруллин исемендәге Әлмәт музыка көллиятен дә төзекләндерү күздә тотыла.
Бу максатларга барлыгы 580 миллион сумнан артык акча тотылачак. Моннан тыш, ел башыннан «Мәдәният» илкүләм проекты нигезендә балалар сәнгать мәктәпләренең 40 мөгаллиме квалификацияне күтәрү курсларын узган. Ә үткән ел 85 мөгаллим белемен арттырган.
«Мәдәният» илкүләм проектының «Цифрлы мәдәният» федераль проекты нигезендә мультимедиа-гидлар булдыруга конкурс сайлап алуының икенче этабы игълан ителде.
***
Россия Федерациясе Мәдәният министрлыгы быел музейларның даими экспозицияләре буенча 75 яңа мультимедиа-гид булдыруга ярдәм итүне планлаштыра. Проектны тормышка ашыру өчен «Артефакт» цифрлы платформасы файдаланылачак. Ул музейларга мультимедиа-гидлар булдыру, ә килүчеләргә мәдәният учреждениеләре экспозицияләрендә һәм биналарында шул ук исемдәге мобиль кушымтадан бушлай файдалану мөмкинлеген бирәчәк. Сайлап алуның икенче этабы 3 августка кадәр дәвам итәчәк.
Экспозицияләр һәм күргәзмә проектлары буенча мультимедиа-гидлар булдыруга гаризалар онлайн рәвештә бирелә. Сайтның адресы экранда күрсәтелгән. Конкурс нигезендә AR-гидлар, шул исәптән рус һәм бер чит телләрдә аудиогидлар язылачак. Һәр әсәр турында фәнни-популяр текстларны эшкәртеп, тасвирламаны чит телгә тәрҗемә итеп, музейда экскурсияләр оештырылачак.
