Республикада уракка төшкән районнар саны артты. Быел Нурлат районы игенчеләренә 40 мең гектарда бөртекле культуралар уңышын җыеп алу бурычы тора. Һава шартлары игеннәр өчен яхшы торды, уңыш та мул. Ашлыкны түкми-чәчми җыеп алу өчен комбайннар да, башка төр техника да, ындыр табаклары да алдан ныклап әзерләнгән. Беренчеләрдән булып арпа кырына “Сөләйманов” крестьян-фермер хуҗалыгы комбайнчылары чыкты.
Мул башаклардан торган арпа кырына беренче булып комбайнчы Рәмис Нәмаев экипажы төшкән. Уракка ныклап әзерләнгән. Берничә ел ярдәмчесе булып үзенең улы эшләсә, быел аны армиягә озаткан. Хәзер тәҗрибәле комбайнчы яшьләрне өйрәтә.
“Сөләйманов” хуҗалыгы быелгы уракны зур оешканлык белән башлап җибәргән. Арпа суктыруда 14 комбайн эшли. Хуҗалыкта комбайнчылар җитәрлек. Янгын куркынычсызлыгын тәэмин итү максатында, су тутырылган цистерна куелган. Техника ватыла калса, эретеп ябыштыру агрегаты кырда ук . Ашатуны да урында оештырганнар. Техникага ягулык –майлау материаллары да шунда ук салына.
Хуҗалыкта уҗым культуралары әйбәт кышлаган, мул уңыш вәгьдә итәләр. Комбайн бункерлары тиз тула. Кырдан ашлыкны турыдан-туры элеваторга озаталар. Быел беренче олау- Николай Кирилловныкы. Кәефе күтәренке.
Игенчеләр шушы кырда үзләре үк бөртек чәчкән, кирәкле агрочараларны үткәргәннәр, хәзер комбайннарда уңышны җыялар. Аларга нинди бүләкләр каралган?
Ел саен Нурлат районы игенчеләре уракны республикада беренчеләрдән булып тәмамлыйлар. Быелгы ниятләре дә маңгай тирен түгеп үстергән ашлыкны вакытында, түкми-чәчми җыеп алу.
Зөлфия Галиуллина, Алмаз Әхмәтҗанов, Татарстан яңалыклары, Нурлат районы.
