Республикада урман янгыннары куркынычы зур. Урманчылар гадәттән тыш хәлләргә әзерлекне, янгыннарны ачыклау өчен заманча технологияләрне күрсәттеләр. Лаеш районыннан безнең репортаж.
Урманчылар менә шундый заманча ут сүндерү җайланмасы белән иң авыр учактокларга да барып җитә ала. Хәзерге эссе көннәрдә урманнарда янгын чыгу куркынычы бик зур. Шуңа күрә урманнарга керү дә чикләнгән. Урманчылар ут-күзгә каршы торырга әзер.
УАЗ машиналарында гадәттән тыш хәл урынына беренче булып киләләр. Алар күчмә ут сүндерү җайланмалары, насослар белән җиһазландырылган. Суны елга- күлләрдән дә суыртып була. Күәтлерәк техника — КамАЗ базасында ике автоцистерна, чылбырлы трактор, иң зур янгыннарны тикшерү өчен мобиль штаб та бар. Янгыннарны ачыклау өчен заманча технологияләр кулланыла.
Белгечләр ГЛОНАС спутник системасы ярдәмендә үзләренә ышанып тапшырылган территорияне күзәтәләр-орбитадагы тепловизорлар температураның үзгәрүен ачыклыйлар, мәгълүматны урыннарга тапшыралар. Лаеш районындагы урман янгыннары үзәге — республикада тиешенчә комплектланган 5 үзәкнең берсе.
Урман янгыннары үзәге ДБУ директоры Айдар Гайфуллин: «урман янгыннары үзәгендә 94 төрле техника бар. Алар барысы да төзек хәлдә, кирәксә, теләсә кайсы вакытта эшкә чыга ала.
Татарстанда 30дан артык янгын сүндерү станциясе эшли. Шулай ук һавадан даими күзәтү алып барыла. Бәхеткә, соңгы 9 ел эчендә республика урманнарында бер генә янгын да теркәлмәгән.
Мурат Метшин, Ирек Хәмидуллин, Татарстан яңалыклары, Лаеш районы.
Татарстанның Урман хуҗалыгы министрлыгы республика территориясендә янгын куркынычы кертелү сәбәпле, халыкны урманга барудан тыелып торырга өндәде. Статистика буенча 10 янгынның 9ы кешеләр гаебе белән килеп чыга.
Янгын куркынычсызлыгы кагыйдәләрен бозган гражданнар өчен, 3 мең сумга кадәр,. вазифаи затларга 20 меңгә кадәр, юридик затларга 200 меңгә кадәр штраф каралган. Республика урманнарында куркынычсызлык максатларында юллар вакытлыча постлар урнаштырылачак.
