Бөтенроссия Дәүләт телерадиокомпаниясе холдингы 30 еллыгын билгеләп үтте. Түгәрәк дата белән меңләгән хезмәткәрдән торган коллективны Россия Президенты Владимир Путин котлады. 1990 елның 14 июлендә РСФСР Югары Советы Президиумы карары белән Бөтенроссия дәүләт телевидение һәм радиотапшырулар компаниясе оештырыла. Хәзер ул радио, Россия 1, Россия 24, “Культура” федераль каналларын берләштергән зур комплекс, ә Россиянең һәр субъектында диярлек төбәк телерадиокомпанияләре бар. Шул исәптән безнең — «Татарстан»Дәүләт телерадиокомпаниясе дә.
Көн саен, көнгә берничә тапкыр без яңалыклар белән эфирга чыгабыз, махсус проектлар әзерлибез, студиядә мөһим мәсьәләләр турында фикер алышабыз, кунакларны көнүзәк мәсьәләргә багышланган әңгәмәләргә чакырабыз, авыл тормышын күрсәтәбез һәм сезнең белән үзебезнең туган телдә дә аралашабыз.
Көн саен иртэн без сезне яңалыклар чыгарылышында сәламләп, республиканың төп, мөһим вакыйгалары белән таныштырып барабыз. Безнең чыгарылыштан соң “Хәерле көн, Татарстан!” тапшыруында кызыклы кунаклар белән очрашулар оештырыла. Татарстан радиосы дулкыннарында көн саен яңалыклар, тематик тапшырулар эфирга чыга. Ә бай тарихлы “Между Волгой и Уралом” радиожурналы 7 республика өчен тапшырулар әзерли. Быел “Татарстан авазы” онлайн-радиосы ачылды, ул тиз арада бөтен дөнья татарларының иң яраткан радиосына әйләнде.
