«Безнең заман» эшче яшьләр иҗаты 8нче ачык республика телевизион фестиваленә гаризалар кабул ителә башлады. Ул ТР Президенты Рөстәм Миңнеханов ярдәме белән ЮНЕСКО химаясендә уза.
Фестиваль эшче һәм инженер һөнәрләрен популярлаштыруга, эшләүче яшьләрнең иҗади потенциалын ачуга юнәлдерелгән. Быел чараның сайлап алу этаплары 2020 елның октябреннән ноябрьгә кадәр билгеләнгән. 4 зонада — Түбән Кама, Әлмәт, Яшел Үзән һәм Казан шәһәрләрендә сайлап алу этабы уза, суперфинал һәм гала-концерт Казанда булачак. Быел фестивальнең мөһим яңалыгы — «Безнең заман геройлары» дип аталган махсус бүләк булачак. Җиңүчеләргә һәм лауреатларга кубоклар, дипломнар, истәлекле бүләкләр тапшырыла. Фестивальнең Гран-при иясе диплом, Татарстан Республикасы Президентының Күчмә кубогы һәм акчалата премия белән бүләкләнә. Гаризалар 2020 елның 25 сентябренә кадәр фестиваль сайтында кабул ителә.
