Әтнә районының Түбән Шашы авылында гомер итүче республикабызның легендар шәхесе Фәйзи Галиевка шушы көннәрдә 95 яшь тулды. Миллионер «Искра» колхозын җитәкләгән сугыш ветераны Фәйзи ага белән хәбәрчебез Мөршидә Җиһан аралашып кайтты.
Түбән Шашыда Фәйзи Галиев яшәгән йортны табуы бик җиңел, аны һәркем белә. Капкасына ук кем яшәгәне язылып куелган. Өч авылны берләштергән күмәк хуҗалык та Фәйзи Галиев исемен йөртә. Фәйзи абый белән күрешергә теләүчеләр күп, өйләренә юл бер дә өзелми. Аеруча мәктәп балалары белән аралашырга ярата. Балаларны күбесенчә сугыш истәлекләре кызыксындыра.
17 яшендә Фәйзи Галиев армиягә алына. Сарапул шәһәрендәге пехота училищесында кыска сроклы курсларда укый. 1943 елның җәендә укуны өзеп Смоленск тирәсендәге сугышка җибәрелә.
19 яшеннән башлап 50 ел колхоз рәисе булып эшләгән Фәйзи Галиев элеккеге буын шәхесе. Андыйларны каты токым дип атыйлар Эшләү дәверендә республика җитәкчеләре Фикърәт Табиев, Гомәр Усманов, Минтимер Шәймиев белән дә уртак тел тапкан Фәйзи Галиев. җитәкчелек тә аңа хөрмәт белән караган.
Лаеклы ялга чыккач та татарстан тарихын чагылдырган ,документаль 6 китап чыгарган. ТАССРның, СССРның Югары Советы депутаты, Ленин, Хезмәт Кызыл Байрагы орденнары, “ТР алдындагы казанышлар өчен” ордены кавалеры, “Татарстанның атказанган колхозчысы”, язучы Фәйзи Галиев — Түбән Шашы авылы кергән күмәк хуҗалыкта бердәнбер сугыш ветераны. Фәйзи абый сул як җилкәсендә әле дә ядрә кыйпылчыгы йөртә. Озын гомерле булу серен гаиләсеннән күрә. Хатыным Сара бик тырыш иде, балаларым, оныкларым йөзгә кызыллык китермәде, горурланырлак булды ди. Бүген Фәйзи бабай улы Тәлгать белән килене Суфия тәрбиясендә бик бәхетле картлык кичерә.
Республика җитәкчелегенең ышанычлы терәге булган акыллы һәм инициативалы рәисләрнең берсе Фәйзи агага шушы көннәрдә 95 яшь тулды. Татарстан телерадиокомпаниясе исеменнән аны чын күңелдән котлап сәламәтлек һәм күтәренке кәеф телибез.
Мөршидә Җиһан, Таһир Хәсәнов.
