ТАССР төзелүнең 100 еллыгына 100 исем. Күренекле артист Усман Әлмиев – халыкның танылган, иң яраткан җырчыларының берсе.
Ул татар сәхнәсенә яңача башкару алымнарын – җанлылыкны, тамашачы белән элемтәгә керүне, сәхнәдә үзен иркен тоту осталыгын, йөз һәм пластик хәрәкәтләр белән идарә итүне алып килде.
Театр техникумында укыган елларда Усман Әлмиев Татар Дәүләт Академия театрында практика уза, актерлык осталыгы алга таба образлар тудыруда булыша. Шуннан соң Мәскәүдә укый. Булачак җырчы Мәскәү консерваториясе каршындагы татар опера студиясендә махсус белем ала. Казанга кайткач, опера театрына солист итеп чакырыла. Театр белгечләре артистның опера сәхнәсендәге иҗади язмышының бәхетле булуын билгеләп үтәләр. Ул татар композиторларының операларында әйдәп баручы барлык партияләрне: Җикмәргән, Самат, Бәдри, Хәлил, Галимҗан һәм башка партияләрне башкара.
Усман Әлмиев татар сәнгатендә эстрада жанрына башлангыч бирүчеләрнең берсе була. Үзенең һәм башкаларның репертуарын киңәйтүдә һәм баетуда күп эшли, татар шагыйрьләрен җырларга текстлар язарга этәргеч бирә. Җәүдәт Фәйзи фольклор экспедицияләрендә 50 татар халык җырын җыя, аларны тавыш һәм фортепиано өчен эшкәртә. Усман Әлмиев “Рамай”, “Таһир һәм Зөһрә” җырларын беренче булып башкара.
Аралашучан, ихлас күңелле, башкаларны тыңлый белүче Усман Әлмиев күп актерлар, шагыйрьләр, композиторлар белән зур иҗади дуслыкта эшли. Ул милли музыка сәнгатен үстерүгә сизелерлек өлеш кертте.
