Татарстан Президенты инициативасы белән башланган «Ярдәм янәшә» хәрәкәтенә бөтен республикадан җиде меңгә якын волонтер кушылды. Ике ай эчендә алар авыр хәлдә калган 250 мең кешегә ярдәм иткән. Мохтаҗларга ярдәм сорап, кая, кемнәргә мөрәҗәгать итәргә? Киләсе репортажда.
Данис Садиновка көн саен иллешәр кеше шалтырата. Волонтер һәркемне игьтибар белән тыңлый, кирәк булса, юрист, психолог кебек белгечләргә консультациягә җибәрә.
Волонтер Данис Садинов: «иң киң таралган сорау — кешеләр азык-төлек җыелмаларына мохтаҗ. Кече бизнеста эшләүчеләр дә шалтырата, алар нинди дә булса юридик ярдәмгә, ә гади кешеләр психолог ярдәменә мохтаҗ.»
Гадәттә, колл-үзәктә телефоннар бер минутка да тынмый. Волонтерлар барысына да ярдәм итәргә тырыша. Ике ай эчендә республикада инвалидларга һәм аз керемле гаиләләргә 55 меңнән артык азык-төлек җыелмасы таратылган. Яшәү урыннары булмаган 180 меңнән артык кешене тукландырганнар.
«ТР Иреклеләр мәгълүмат-ресурс үзәге» коммерцияле булмаган автоном оешмасы башкарма директоры Айрат Мөбарәкшин: «Бу игелек кылуның дәрәҗәсен күрсәтә. Волонтерлар кешеләрнең хәлен аңлыйлар, ярдәмгә ашкынып торалар. Тормышта һәркем белән төрле хәл булырга, авырлыклар килергә мөмкин бит.»
«Ярдәм янәшә» иҗтимагый хәрәкәте Татарстан Президенты Рөстәм Миңнеханов инициативасы белән башланды. Республиканың авыр хәлдә калган кешеләренә мәгълүмати, психологик, белем бирү өлкәсендә ярдәм күрсәтелә. Зур, кече предприятиеләр һәм гади кешеләр булыша. Азык-төлек җыелмаларына гына да өч йөз миллион сум акча җыелган.
Волонтер Тимур Галәветдинов: «гражданнарга ярдәм алу өчен, “Ярдәм янәшә”сайтына гына керергә, төймәне табып, бераз түбәнрәк төшәргә һәм “Мне нужна помощь” дигән сүзләргә басарга. Форманы тутырып, җибәрергә.»
ТИТР 8-800-700-9205 помощьрядом16.рф
Сайтның адресы экранда күрсәтелгән. Белгечләр шулай ук кайнар линия аша да киңәшләр бирә.
Ралина Абрамова, Владимир Юрков.
