Татарстанның кан тапшыру үзәге #Оставайсядонором» Бөтенроссия акциясенә кушылды. Ул атна буена 15 июньгә кадәр барачак. Программада – төрле конкурслар, кызыклы чыгышлар, башкалар гомерен саклап калу өчен үз канын кызганмаган кешеләргә бүләкләр тапшыру. Акция 14 июньдә билгеләп үтеләчәк Бөтендөнья донор көненә багышлана.
Бөтенроссия кан бирү акциясенең беренче көнендә үк республика кан тапшыру үзәгендә җанлылык иде. 100 кеше донор булды. Гадәти көннәрдә дә кан бирергә теләүчеләр күп.
ТР Сәламәтлек саклау министрлыгының Республика кан тапшыру үзәге баш табибы Рамил Тураев: «Бүгенге көндә бездә кирәкле күләмдә кан бар, запас та тотабыз. Кешеләр гомерен саклап калуга булышшканнары өчен шушы акциядә катнашкан һәркемгә зур рәхмәтемне җиткерәсем килә.»
Донор каны көн саен миллионлаган гомерне коткара. Ул травматологиядә, хирургиядә, онкологиядә, ашыг, ашыгыч операцияләр ясаганда кирәк. Шуның өчен «Донор көне» бөтен дөнья календарьларында кызыл төс белән билгеләнгән. Безнең республикада да атналык акция нәкъ менә шушы датага туры китерелде. Кан тапшыручыларга стандарт акча һәм ял көне бирелүдән тыш, кызыклы программалар, шулай ук истәлекле бүләкләр дә әзерләнде.
«Игелекле Казан» коммерцияле булмаган автоном оешмасы директоры Марат Исмәгыйлев:«Без добраяказан.нокта ру сайтында махсус теркәүне оештырдык. Аерым чикләүләр режимы эле бетерелмәде, шуңа күрә, массакүләм чаралар һаман да тыелган. Хәзер донорлар кан бирергә таксида бушлай килә ала, моның өчен теркәлгәндә промокод алырга кирәк.»
Процедура элеккегечә үк, башта анализлар бирергә, аннары гына кан тапшырырга була. Донорның үзе белән паспорт һәм снилс булырга тиеш. Барлык шартлар да Республика кан тапшыру үзәге сайтында җентекләп язылган. Үзәкнең үзендә дә консультацияләр алырга мөмкин.
Булат Шакиев. Сергей Павлухин.
