Татарстанда «Демография» илкүләм проекты уңышлы гамәлгә ашырыла. Быел республикада 22 заманча яңа балалар бакчасын ачу күздә тотыла. 340 урынга исәпләнгән иң зур бакчалар Биектау районы үзәгендә, Казанның «Залесный Сити», «Светлая Долина» торак комплексларында ачылыр дип көтелә. Түбән Камадагы 29 һәм 35а микрорайоннарында 260шар урынлы ике бакча беренче тапкыр балаларны кабул итәчәк. Ә Яшел Үзәндә 220 балага исәпләнгән бакча салына.
Буа шәһәрендә һәм Лаеш районының “Южный парк” торак комплексында төзелүче бакчаларга 260шар, Питрәч районың Царево торак комплексындагы бакчага 220 бала йөриячәк. Чаллыда шулай ук 220 шәр балага исәпләнгән өч бакча төзелә. Алар Мәләкәс арьягындагы 22нче, 25 нче комплексларда һәм Зяб бистәсендә урнашачак. Шундый ук балалар бакчаларын башкалабызның «Седьмое небо» һәм «Волжские просторы» торак комплексларында да ачу күздә тотыла.
“Демография” илкүләм проекты буенча Казанның Иске Аракчино, “Весна-2”, “Салават күпере” комплексларында да яңа балалар бакчалары салына. Проектта быел шулай ук республиканың кайбер авылларында да яңа бакчалар ачу каралган. Арча районында, Саба районының Иләбәр, Тукай районының Әҗмәкәй авыллары бакчалары да нәниләрне кабул итәчәк.
