Республикада коронавирус таралуны булдырмас өчен кертелгән чикләүләр йомшартыла. Бүген, ягъни 5 июньнән башлап, Татарстан мәчетләре һәм чиркәүләре эшли башлаячак. Әлеге карарга Татарстан премьер-министры Алексей Песошин кул куйды. Беренче вакытта республика гыйбадәтханәләренә килүчеләр саны чикләнә. Мәчетләргә, намаз бүлмәләренә бары тик саклану чараларын киеп кенә кереп булачак. Мәйданы 400 кв. метрдан артмаган объектларда, дин әһелләре һәм мәчет хезмәткәрләренең үзләрен исәпкә алганда, һәр кешегә 4 кв.метр мәйдан туры килергә тиеш. Әгәр корылманың мәйданы 400 кв. метрдан артып китсә, бер үк вакытта анда 100 дән артык кеше була алмый. Шулай ук социаль дистанция — кешеләр арасында 1 метр ярым ара булырга тиеш.
Бүгенге көннән башлап шулай ук мунча һәм сауналарга да эшләргә рөхсәт ителде. Чикләүләр белән фитнес үзәкләр, йөзү бассейннары да теләүчеләр өчен ачык булачак. Ә кинотеатрлар, төнге клублар, балалар уен бүлмәләре әлегә эшләмиләр.
