Республикада авыл хуҗалыгына ярдәм итү программалары уңышлы гамәлгә аша. Әлмәт районының Токарликов исемендәге фермер хуҗалыгында быел яңа азык үзәге барлыкка киләчәк. Проект гамәлгә ашкач, үзәктә җитештерелгән терлек азыгын сатуга да чыгарырга җыеналар. Шулай ук хуҗалыкның үзендә дә малларның баш саны артачак – якын арада 200-300 баш нәселле терлек сатып алыначак. Тулырак киләсе репортажда.
Бу сыерларны Венгриядән алып кайтканнар. 2017 елның декабреннән бирле Голштин токымлы малларны заманча комплекста асрыйлар. Хәзер аларның саны 1650гә җиткән. Шуларның 820се — савым сыерлары. Узган ел һәрберсеннән 8 ярым тоннага якын сөт савып алынган. Комплекс махсус югары технологияле җайланмалар белән җиһазландырылган.
Әйдәп баручы зоотехник-селекционер Ринат Салихов: «территориядә биш трактор һәм бер үзйөрешле азык катнаштыргыч эшли, терлек азыгы малларга җиһазлар ярдәмендә таратыла. Бу чыгымнарны киметү һәм терлек азыгын экономияләү өчен кирәк.»
Комплекста 87 кеше эшли. Бозау караучылар, ветеринарлар, зоотехниклар, лаборантлар, учетчик-селекционерлардан тыш, тагын 16 саву операторы. Тәүлегенә 22 тонна сөт савыла. Бер сыерга уртача 33 литрга җитә.
Әлеге лабораторияләрдә сөтнең сыйфатын тикшерәләр-белгечләр, кулланучыга югары сыйфатлы продукт барып җитсен өчен, майлылыкны, башка күрсәткечләрне бәялиләр. Иртәдән сөт комбинатларга озатканчы, сөткә анализ ясыйлар.
Комплекс лаборанты Валентина Клюева: «без сыерлардан югары сыйфатлы сөт савабыз, аны төрле сөт комбинатларына озатабыз. Заказчылар арасында Әлмәт, Чистай сөт комбинатлары, шулай ук «Кама аръягы» сәүдә комплексы бар. Безнең сөт сыйфатлы, бик теләп алалар.»
Комплекста печән, салам, силос, шулай ук арпа белән бодайдан фураж, кукуруз әзерлиләр.
Әйдәп баручы зоотехник-селекционер Ринат Салихов: «быел бездә терлек азыгы үзәген төзү планлаштырыла, ул барлык сөтчелек комплексына хезмәт күрсәтәчәк. Алга таба терлек азыгы җитештерүне арттырып, аны башка фермерларга да сатарга җыенабыз.»
Яңа азык үзәге сөт-товар комплексы территориясендә урнашачак. Хәзерге вакытта проект эшләре бара.
Ангелина Хәбибуллина, Илшат Бәхтиев.
