1 июньнән миллионлаган россияленең тормышында үзгәрешләр көтелә. Җәй җитү белән, илдә күп кенә төрле яңалыклар үз көченә керә. Бу үзгәрешләр Россия гражданнарының һәр категориясенә дә кагылачак. Шуларның кайберләре турында алдагы язмада.
Коронавирус йогышы пандемиясе белән бәйле рәвештә, балалы гаиләләргә матди ярдәм күрсәтеләчәк. Акчаны 1 июньнән үк түли башлаячаклар. Аерым алганда, илнең мохтаҗ гражданнары өчен пособие каралган. Бу-3 яшьтән 7 яшькә кадәрге балалар тәрбияләнә торган гаиләләр, ә бер кешегә керем яшәү минимумыннан артмый. Алар өчен айлык түләү күләме 5 мең 500 сум тәшкил итәчәк. Моннан тыш, яңа бер тапкыр бирелә торган түләүне Россиянең 3 яшьтән 16 яшькә кадәрге балалары булган барлык гаиләләре ала алачак. Шул ук вакытта ата-аналарның керем дәрәҗәсе исәпкә алынмый. Пособие күләме һәр балага — 10 мең сум. Акча алу өчен ата-аналарга гариза бирергә генә кирәк. Акча 1 июньнән гаилә счетларына керә башлаячак.
Миллионлаган пенсионерлар өчен дә мөһим үзгәрешләр 1 июньнән үз көченә керде. Әлеге категория гражданнарны яклау чаралары арта. «Башкарма производство турындагы» Федераль законга сизелерлек үзгәрешләр кертелде. Хәзер социаль түләүләрдән әҗәтләрне түләттерү тыелачак. Приставлар, аерым алганда, пенсияләрдән, алиментлардан, ана капиталыннан һәм кайбер башка пособиеләрдән акча тотып кала алмый. Исәп-хисап документларында тиешле керем төре коды барлыкка киләчәк. Суд приставлары һәм банк хезмәткәрләре дә түләттерү буенча мөрәҗәгать иткәндә, бу акчаларны арестка алып, кулларына төшерә алмаячаклар.
1 июньнән балалар ялын һәм сәламәтләндерүне оештыру белән махсус реестрга кертелгән оешмалар гына шөгыльләнә ала. Аңа эләгү өчен, лагерьларга тикшерү узарга кирәк. Реестр тулысынча ачык һәм аны интернетта карарга була. Һәр ата-ана, баланы лагерьга җибәргәнче, ял оештыра торган фирманың ышанычлылыгын тикшерә һәм инана ала. Тикшерү узмаган Компанияләр, дөрес булмаган мәгълүмат яки балалар ялын оештыруга карата таләпләрне системалы рәвештә бозган очракта, реестрдан төшереп калдырылачак. Бу балалар ялы өлкәсендә эшне автомат рәвештә тыю дигәнне аңлатачак.
