Соңгы вакытларда умартачылыкка игътибар артты. Бал кортларын саклауга, үрчетүгә юнәлтелгән төрле программалар гамәлгә керде. Умарта ояларын “паспортлаштыру”, грантлар бирү – әнә шундыйлардан. Буа районының Иске Суыксу авылында яшәүче Сөләйман Сафиуллинның барлык умарталары паспортлаштырылган, авыруларга каршы профилактик чаралар уздырылган. Умартачы бал кортларыннан, серкә җыю белән дә шөгыльлләнә.Четерекле, әмма мавыктыргыч эшнең барышы белән хәбәрчебез Ранис Әхмәтшин дә танышып кайтты.
Тыз-быз килеп бал җыючы бал кортлары хакында ул сәгатьләр буе сөйләргә мөмкин. Быел ул оялар исәбен 240ка җиткерергә планлаштыра. Бу максатта яшь умартачы “Агростартап” проекты буенча крестьян (фермер) хуҗалыклары булдыру һәм үстерү” программасында катнашып, 3 миллион сумлык грант откан.
Бал кортлары һава температурасы 14 градуска кадәр җылынгач, оча башлыйлар. Бүгенге көндә алар тузганак һәм акация чәчәге нектарын җыя. Соңрак горчица, рапс һәм башка авыл хуҗалыгы культуралары чәчәк ата башлый. Сөләйман умарта ояларын җәй дәвамында күчереп йөртә. Шуңа да аның өчен фермерлар, авыл хуҗалыгы белгечләре белән хезмәттәшлек итү, ягъни кырларны агулау вакытын белеп тору аеруча мөһим.
Балавыз алуның да табигый ысулын тапкан Сөйләман. Ул аны кояшта эретеп ала. Соңрак һәркайсын сатуга чыгара.Умартачылар моның белән аз шөгыльләнгәнгә сорау да зур икән. Ә Сөләйманның кулында паспорты булганга, ул базарда иркенләп сата ала.
Ветеринария-санитария паспортларын барлыгы районда 53 умартачы алган. Аларны бал кортлары булган ояларны барлап, берләшмә белгечләре кыш көне дә тапшырдылар.
Ветеринарлар умартачыларның бу эштә активрак булуын сорыйлар. Авырулар иртәрәк ачыкланган очракта, аларны дәвалау җиңелрәк һәм нәтиҗәлерәк.
Ранис Әхмәтшин,Гакыйл Камалетдинов.
