Татарстан мөселманнары Диния нәзарәте волонтёрлары, «Чиста мәчет» акциясенең җәйге сезонын башлап җибәрде. Янәдән Казан мәчетләрен чистарту-җыештыру эшенә керештеләр. Бу хакта Диния Нәзарәтеннән хәбәр иттеләр.
Дөнья күләмендә авыр эпидемиологик хәл урнашу сәбәпле, соңгы ике айда мәчетләр халык тарафыннан игътибарсыз калган иде. Шул ук вакытта, вируслы инфекцияләр таралуны булдырмау максатыннан, чисталыкны тәэмин итү һәм дезинфекция уздыруның әһәмияте тагын да артты. Хәзерге вакытта өмәләр үткәрү өчен мәчетләр исемлеген төзү дәвам итә. Яшь егетләр-кызлар, гадәттәгечә, тәрәзәләрне, стеналарны, идәннәрне юачак, тузаннарны сөртәчәк, чүпләрне түгәчәк.
Чираттагы өмә Казанның Мамадыш трактында урнашкан «Сәлах» мәчетендә узды. Волонтерлар дезинфекция үткәрде, махсус чистарту чаралары белән келәмнәр чистартылды, ишек-тәрәзәләр, баскычлар юылды.
Быел яз башыннан мөселман яшьләр активы вәкилләре шулай Казанның «Борнай», «Мәүлид», «Рамазан», «Мәдинә», «Гаилә», «Зәңгәр» мәчетләрендә, Лаеш районы Усад авылының «Ихлас» мәчетендә өмә үткәрергә өлгергән инде. Акциядә теләгән һәркем катнаша ала.
237 86 18 @muslimmol
Теләк белдерүчеләр нәзарәтнең социаль үсеш бүлегенә шалтыратып теркәлү уза яки Инстаграм социаль челтәре аккаунтына яза ала. Үзең белән чиләк, чүпрәк, губка, сабын, порошок алып килү хуплана.
