Коронавирус таралу куркынычы шартларында чикләүләргә карамастан, республикада шәхси ярдәмче хуҗалыклар уңышлы гына эшләп килә. Барлык авыл хуҗалыгы продукциясенең яртысы диярлек алар өлешенә туры килә. Базарда сату элекккеге күләмдә саклана. Спас районында да шәхси хуҗалыклар саллы гына эшли.
Хәзер Рәфис Хәйруллинның эшләре көйле бара. Үз хуҗалыгында җитештерелгән азык-төлек белән гаиләсен дә тулысынча тәэмин итә, артып калган продуктларны кече кибетләргә дә сатуга чыгара. Ул эшчәнлеген 97нче елда туган авылына армиядән кайткач башлап җибәрә. Башта дуңгызлар асрый, аннары үгезләр симертүгә күчә. Участокта сарай кора, аннары мини-ферма барлыкка килә, терлек азыгы һәм фураж ашлыгы үстерү өчен 184 гектар җир ала. Бүгенге көндә сөт терлекчелеге өлкәсендә эшли.
Фермер Рәфис Хәйруллин: «ярдәмче хуҗалык тотучылар сөт хисабына яши дә инде. Сөтне литры 21-21 сумнан тапшырабыз. Һәр 15 көн рассчитываются + минем өчен отышлы.»
Хуҗалыкта хатыны белән икәү эшлиләр. Элек Рәфис барысын да берүзе эшләгән. Трактор, йөк машинасын йөрткән, төягечтә, сыер абзарында кайнашкан. Ә хәзер колачы киңәйгән. Сезонлы эш вакытында башкаларны да ялларга туры килә. Эшне җайга салу өчен, зур теләктән тыш, бөтен кирәкле техника булу мөһим, дип саный.
Фермер Рәфис Хәйруллин: «Нинди кирәк – минем барысы да бар. МТЗ-82, «Дон» комбайны, пресс-җыючы, чәчкечләр, арбалар. Барысы да бар. Техникадан башка игенчелекне башларга да кирәкми.»
Кем әйтмешли, үз көче белән аякка баскан. Ә хәзер республикада авылга ярдәм итү буенча президент программалары уңышлы эшли. Берничә ел элек шундый программаларның берсе ярдәмендә хуҗалыгын зур асфальт юлга тоташтырган.
Спас муниципаль районы авыл хуҗалыгы һәм азык-төлек идарәсе җитәкчесе Дмитрий Савинов: «Фермерларның ышанычы артты. Республика һәм федераль бюджетлардан махсус программалар финанслана, бу зур ярдәм.»
Районда шәхси ярдәмче хуҗалыклар һәм фермерлар елдан-ел арта. Президент программаларының якындагы елларда да уңышлы эшләячәгенә өметләнәләр.
Дмитрий Второв, Ленар Хәбибуллин, Рөстәм Муллагалиев.
