Россия президенты Владимир Путин Рөстәм Миңнехановның киләсе Татарстан Президенты сайлауларында үз кандидатурасын тәкъдим итү турындагы тәкъдимен хуплады. Бу хакта ул видеоконференция элемтә режимында узган эшлекле очрашу барышында белдерде. Республика Президенты ил җитәкчесенә төбәктәге агымдагы хәл турында хәбәр итте. Рөстәм Миңнеханов үз докладын республикада коронавирус белән бәйле хәлдән башлады. Татарстанда ярдәм чараларының тормышка ашырылуы, илкүләм проектлар буенча эш алып барылуы, республика программаларының гамәлгә ашырылуы турында сөйләде. Алда торган Ураза бәйрәмен бәйрәм итү турында да фикер алыштылар. Татарстанда бу көнне ил президенты билгеләмәләренә ярашлы рәвештә бернинди массакүләм чаралар да планлаштырылмаган.
Рөстәм Миңнеханов бу бәйрәмне үзе дә өйдә билгеләп үтәчәген белдерде. Татарстан Президенты Владимир Путиннан республикада гамәлгә ашырыла торган ике проектка ярдәм итүне сорады. Болар — йогышлы авырулар хастаханәсенең яңа корпусын һәм Зур Казан боҗрасын төзүгә бәйле проектлар. Владимир Путин бу мәсьәләләрне хәл итәргә кушты. Очрашу ахырында Рөстәм Миңнеханов искәрткәнчә, аның вәкаләтләре чоры сентябрь аенда тәмамлана. Дәүләт башлыгы аның яңа срокка үз кандидатурасын тәкъдим итүен хуплавын белдерде.
