Нәкъ менә алар – ак халатлы фәрештәләр кешеләр сәламәтлеге сагында тора, авыр чакта ярдәмгә ашыга. Медицина хезмәткәрләренең хәзерге катлаулы эпидемиологик шартларда вакытлары бик тыгыз. Кайберләре көн саен үз гаиләләрен дә күрмичә, Гиппократ антына тугрылык саклап, кешеләр сәламәтлеге сагында торалар. Түбән Кама шәһәрнең инфекцион госпиталендә коронавирус белән көрәшүче табибларга рәхмәт сүзләре җиткерделәр. Авырулар белән эшләүче табиблар, шәфкать туташлары “Юность” лагерендә яши. Анда Түбән Камадагы хәбәрчебез Рушания Сибатова да булып кайтты.
Түбән Кама медицина көллияте студенты Рәдиф Галиев: «Башта авыр иде беренче көннәрне. Ул респираторлар костюм эссе. Әкренләп ияләндем инде.»
Рәдиф Галиев – медицина көллиятенең 4 курс студенты. Ул да табиблар белән беррәттән, короновирус йоктыручы пациентлар белән эшли. Әлеге медицина хезмәктәрләре якыннарын күрмичә, «Юность» лагерендә яши.
Шәһәр башлыгы урынбасары Эльвира Долотказина һәм сәламәтлек саклау идарәсе башлыгы Венера Рәхимова медицина хезмәткәрләренә күчтәнәчләр алып киләләр.
Түбән Кама башлыгы урынбасары Эльвира Долотказина: «Беләсезме, мин монда килгәндә үземне каһарманнар янына баргандай тойдым. Сез гел алгы планда торасыз, сез бөтен шәһәрнең күз алдында. Госпитальдәге авыруларның да, шәһәрдәге башка кешеләрнең дә сәламәтлеге сагында торасыз. Авыруларга зур теләктәшлек күрсәтәсез. Бердәм Россия партиясе сезгә эшләргә күңеллерәк булсын дип, күчтәнәчләр җибәрде.»
Әйтергә кирәк, “Юность” лагерендә 50 дән артык медицина хезмәткәре яши. Бу – табиблар, шәфкать туташлары, санитарлар һәм дезинфекторлар. Яшәү шартлары яхшы — бүлмәдә 2 шәр кеше. Ашату 4 тапкыр. Саф һавда йөрү мөмкинлеге бар, якыннары белән интернеттан аралашалар. Ак халатлы геройларның түбәнкамалыларга әйтәсе килгән сүзләре – саклану чараларын киеп йөрү.
