Актаныш районының Аккүз авылы халкы Бөек Җиңүнең 75 еллыгына шушы җирдә туып- үсеп, Ватаныбыз тынычлыгын саклап изге яуда һәлак булганнарның истәлегенә өр-яңа һәйкәл сафка бастырган. Моның өчен үзара салым акчасыннан файдаланганнар. Һәйкәлне зурлап тантаналы шартларда соңрак ачарга җыеналар.
Аккүз авыл җирлегеннән 321 кеше Бөек Ватан сугышына киткән, шуларның 68е генә туган ягына исән-сау кайта алган, 253 е мәңгелеккә ятып калган. Хәзер җирлектә ун тыл ветераны, 52 сугыш чоры баласы яши. Җиңү көнендә Актаныш муниципаль район Советы аппараты җитәкчесе Альберт Тимеров, “Чишмә” хуҗалыгы җитәкчесе Рәфик Сәхәбетдинов, авыл башлыгы Галина Имамова, авыл активы һәйкәлгә чәчәкләр салды. Аккүз авылы имамы Даниф Гарипов һәлак булган солдат авылдашлары, тылда көнне төнгә ялгап, алны-ялны белми хезмәт куйган хатын-кызлар, өлкән буын рухына атап, дога кылды, аятьләр укыды.
Яу кырында ятып калган авылдашлар хөрмәтенә Яңа Кадермәт авылында да 1991 нче елда һәйкәл куела. Замана шаукымы кечкенә авылны соңгы елларда картайта башлагач, һәйкәл үзе дә, бакчасы да ятимгә әйләнә. Чаллыдан туган нигезен саклау нияте белән Яңа Кадермәткә күченеп кайткан Мөдәрис абый Низамов һәйкәлне карап тотуны үз өстенә ала. Мөдәрис абыйның әтисе Бөек Ватан сугышының башыннан ахырына кадәр катнаша. Шуңа күрә Билгесез солдатка куелган һәйкәл аның өчен бик кадерле.
Изге күңелле авылдашлары, җитәкчеләр ярдәме белән һәйкәл бакчасын Мөдәрис абый өянке, чаганнардан чистарта. 9 мең сум күләмендә үз акчасын һәйкәлне төзекләндерүгә тота. Җиңү көнендә Низамовлар гаиләләре белән һәйкәл янына килде, бабалары, авылдашлары рухын кадерләп искә алды.
Ләйсән Газизова.
