Быел Бөек Җиңүнең 75 еллыгына багышлап «Без сугышта юлбарыстан көчлебез» проекты тормышка ашырыла. Проект кысаларында Тукайның 1943 елда дөнья күргән беренче академик басмасының беренче томының сугыш кырларында булган нөсхәсе тәкъдим ителә. Тулырак киләсе язмада.
Китап Габдулла Тукай үлеменә утыз ел тулган елда дөнья күрә. Ул Милли музей фондында саклана. Бөек Ватан сугышында катнашкан күренекле татар әдибе, журналист Мөхәммәт Садриның шәхси китапханәсеннән алынган. «Габдулла Тукай һәм Бөек Ватан сугышы” темасын ача торган экспонатлар — китаплар, открытка, фотография һәм башка тарихи документлар белән социаль челтәрләрдә танышу мөмкинлеге ачыла. Коронавирус инфекциясенә каршы профилактика чаралары үткәрелү сәбәпле, проект Габдулла Тукай әдәби музее сайтында, Вконтакте һәм Инстаграм социаль челтәрләрендә гамәлгә куела.
