Апас районында яшәүче Гашкия Фәйзуллина гомере буена фронтта һәлак булган әтисе каберен эзләп табарга хыялланган. 80 яшендә генә Кырымдагы туганнар каберлегенә күмелгән әтисенең каберен барып күрә. Ә сугышка кадәр әтисе армиягә киткәндә кызга әле өч ай гына тулган була. Әтисенең фотосүрәте дә сакланмаган, аны хәтерләми дә. 80 елдан соң гына ачы сугыш хәтирәләре күңелендә кабат яңара.
Вилдан Әхмәдуллинны армиягә алганда, кызы Гашкия өч айлык кына була әле. Ә өч яшендә әнисе белән әтисенең һәлак булу турындагы хатны укып елавы хәтерендә калган.
Кырым фронтының укчылар дивизиясе кызыл армиячесенең сулышы 42 нче елның маенда Ленин районында оборонада торганда өзелә. Гашкия 80 елдан соң әтисенең каберен эзләп таба.
Солдатның каберен Интернет ярдәмендә табалар. Кызыл армияче Вилдан Әхмәдуллин исеме «Керчь шәһәре һәм ярымутравы” ның Хәтер китабына кертелгән. Петрово тимер юл станциясе янында Кырым фронты солдатларының туганнар каберлегенә күмелгән. Узган ел кызы һәм оныклары батыр солдат каберенә барганнар.
Вилдан Әхмәдуллинның оныгы Фәрит Фәйзуллин: «Әлеге туганнар каберлегендә безнең бабай белән бергә 300дән артык сугышчы җирләнгән. Безгә мемориаль такта куярга тәкъдим иттеләр. Бер айдан безне такта кую тантанасына чакырдылар. Безне җылы каршы алдылар.»
Хәзер Фәйзуллиннар гаиләсе яңа хыял белән яши. Максатлары коронавирус таралу куркынычы сәбәпле дәвам иткән чикләүләр бетерелгәч, Кырым җиренә кабат барып, бабаларының каберен яңа буын оныкларына да күрсәтү.
