Бүген радио һәм элемтә тармагы хезмәткәрләре көне. Татарстан дәүләт радиосының бер гасырга якын бай тарихы бар. Аны тыңлап күпме буын үсте, чыбыклы радио вакытыннан бирле ул никадәр гаиләнең өендә якын дус кебек сөйләп торды, матур сөйләм теленә өйрәтте.Хөрмәтле элемтэ тармагы хезмәткәрләре, Һөнәри бәйрәмегез белән ихластан котлыйбыз, эшегездә уңышлар, нык сәламәтлек, күтәренке кәеф, иминлек телибез.
Күп еллар дәвамында радионың меңнәрчә җырлар, классик әсәрләр, куелышлар, спектакльләрдән торган үз фонды булдырылды. Иҗтимагый-сәяси тормышыбыз да киңкырлы яктыртыла. Традицияләр дәвам итә. Әле март аенда гына “Татарстан авазы” интернет радиосы да барлыкка килде. Ул Татарстан президенты Рөстәм Миңнеханов ярдәме белән булдырылды. Тәүлек дәвамында эшләүче радиодан татар музыка сәнгатенең иң яхшы үрнәкләре, заманча эстрада музыкасы, нәфис сүз, шигырьләр, татар халкының бөек шәхесләре турында истәлекләр, хатирәләр яңгырый. “Татарстан авазы” — җир шарының теләсә кайсы почмагында татар композиторлары музыкасын тыңлау өчен уникаль мөмкинлек. Оештыручылар төрле ерак төбәкләрдән уңай фикерләр ала.
“Татарстан авазы” интернет-радиосын – һәркайда, һәркем тыңлый ала. Үз телефоныгызда “Татарстан авазы” махсус кушымтасын урнаштырып яки ТРТ-тв . ру сайтында тыңлый аласыз.