#БессмертныйПолкОнлайн #БессмертныйПолкТатарстан
Быел Казанда 9-нчы майда Җиңү парады һәм бәйрәм салюты булмаячак, Бөек Җиңүнең 75 еллыгына багышланган әлеге чаралар соңрак вакытка күчерелде. Ә Җиңү көнендә — истәлекле зур мәдәни һәм күңел ачу программасы әзерләнде, аны онлайн режимда карарга мөмкин булачак. Бәйрәмнең үзәк мәйданчыгы, гадәттәгечә Җиңү паркы булачак. 9-нчы майда биредә Җиңү Байрагын 50 метрлы флагштокка символик күтәрү оештырылачак. Совет солдатына яңа һәйкәл дә ачыла, ул Рейхстаг өстенә байрак кадаучы Гази Заһитов образын чагылдыра. Һәйкәлнең авторы — Мәскәү скульпторы Никита Мазаев.
Җиңү көнендә шулай ук «Авто-ретро-клуб-21» республика иҗтимагый оешмасында катнашучылар сугыш еллары автомобильләрендә бәйрәм йөреше ясаячаклар. Беренче тапкыр «Үлемсез полк» дистанцион рәвештә узачак.Ул 28 апрельдә башланды иде.
Һәрбер кеше әлеге акциягә кушыла ала. Моның өчен, Бөек Ватан сугышында катнашкан туганнары турында мәгълүмат җыеп, аннары фотосүрәт ясарга яки видеоязма төшерергә, ә текстта үз героегыз турында сөйләргә кирәк булачак. Материалны «ВКонтакте», Instagram яки «Одноклассники» социаль челтәрләрендә #БессмертныйПолкОнлайн #БессмертныйПолкТатарстан хештеглары белән урнаштырырга кирәк.
