Үзизоляция вакытында кемдер вакытын ничек уздырырга белмәсә, икенче берәүләр аны әрәмгә үткәрмәскә тырыша. Буа дәүләт драма театрының сәнгать җитәкчесе Раил Садриев бу көннәрдә үз бакчасындагы яңа өлгергән кыярларын инстаграм битенә куеп, күпләрне сокланырга мәҗбүр итте. Күңелләргә үтеп керерлек шигырьләре, күз явын алырлык чәчәкләре иҗат кешесенең рухын баета. Тик утырырга яратмаган, ә менә йогышлы вирус таралу куркынычы өйдә утырырга мәҗбүр иткән сәнгать кешесенең көнкүреше мизгелләре белән танышыйк.
Затлы сәхнә костюмнарын ул бүген гади киемнәргә алыштырган. Өйдә утырганда помидорларына су сибәргә дә, калган яшелчәләрен карарга да вакыты җитә аның. Тышта салкын, карлы яз булса да кыярлары да, помидорлары да сап-сары чәчәктә утыра.Ә алар монда шактый.Һәр кайсын хакында тәмләп сөйли.
Алдагы елларда теплицада казынырга вакыт аз калса, быел менә шундый мөмкинлек туган.Тик утырырга яратмаган, әмма таҗлы вирус өйдә утырырга мәҗбүр иткән сәнгать кешесе һәр нәрсәдән тәм таба.
Вакытлы матбугатка да язылырга өлгергән. Онлайн рәвештә. Иң беренче җирле газетага, аннары республикада чыга торган газет-журналларга язылган.
Зәвык белән бизәлгән өйдә барысы да үз урында. Үз куллары белән язылган картиналар, гастрольләр вакытында алган истәлекле сувенерлар. Хатыны Эльмира уены-чыны белән бергә кушып иренең өйдә утырганына шатланып туя алмый. Күңелем тыныч, аның өчен борчыласым юк ди.
Эш бүлмәсе тәрәзәсе аша күренеп торган матур табигать кочагы аны яңа иҗат киңлекләренә чакыра. Кыраларга бирешмичә чәчәк атып утыручы гөлләре киләчәк көннәрнең ямьле һәм матур булачагына өметләндерә.
