“Безнең ишегалды» программасы Татарстанда тулы күләмдә гамәлгә ашырылачак. Илдә коронавирус инфекциясе таралу белән бәйле катлаулы икътисади вәзгыять уңаеннан, программаны үтәү вакытын 3 елдан 5 елга кадәр озайту турында карар кабул ителде. Быел республикада 1 меңгә якын ишегалдын төзекләндерү планлаштырыла. Ә инде Чаллыда күптән көтелгән төзекләндерү башланды. Сидоровка бистәсендә “Безнең ишегалды” программасы буенча эшләр старт алды. Исегезгә төшерәбез, быел Чаллыда барлыгы 218 ишегалдын төзекләндерү күздә тотыла. Беренче эшләрнең барышы белән хәбәрчебез Эльвина Андрова танышты.
Җимерелгән юллар, тротуарлар, иске балалар мәйданчыклары. Боларның барысы да Сидоровка бистәсенең берничә йортында яшәүчеләр өчен үткәндә калып бара. Биредә, шәһәрнең күпчелек микрорайоннарындагы кебек, төп проблемаларның берсе – машина кую урыннары җитми. Ишегалдын реконструкцияләгәндә халыкның әлеге зарына аерым игътибар бирелде.
Ремонт бер үк вакытта алты ишегалларында башкарыла: С6, С20, С26, Магистраль урамындагы 18нче һәм 20нче йортлар ишегалдында һәм Гвардия урамындагы 4нче йортныкында. 30дан артык техника җәлеп ителгән.
Ике атна дәвамында асфальт-бетон катламын алмаштыруны төгәлләргә планлаштыралар, аннан соң калган эшләр башланачак. Төзүчеләр шәһәрдәшләрдән ишегалларыннан машиналарын алуны сорый.
Эльвина Андрова.
