“Мәхәббәт юллары” сәхифәсенең чираттагы кунаклары – Алексеевский эшчеләр бистәсендә яшәүче Галина һәм Алексей Солдатовлар. Аларның бергә кавышып яши башлауларына да 55 ел вакыт узган. Икесе дә җитәкче урыннарда эшләп, абруй казанган хөрмәтле кешеләр.
Мәхәббәт юлы безне Алексеевск районына алып килде. Безнең сюжет геройлары-Солдатовлар гаиләсе. Аларның мәхәббәт тарихы 55 ел элек башланган. Тәтеш совхоз – техникумында укыганда танышканнар. Ул вакытта Галинага 20 яшь кенә була, ә Алексейга 23. Беренче караштан ук бер-берсенә гашыйк булалар. Гомерләре буена бер-берсен аңлашып, хөрмәтләп яшиләр.
Галина һәм Алексей Солдатовлар: » бер төркемдә укыдык. Укыганда күп вакытны бергә үткәрә идек. 4 ел ярым шулай узды. 65 нче елда укуны тәмамлап, Алекссекский районына эшкә килдек. Анда да очрашып йөрдек. Бер-беребезгә өйләнешергә, гомергә бергә булырга сүз бирдек.»
Гашыйк булгач, озак көттермәдек, ди Галина. Күп тапкырлар очрашып йөрмәгәннәр, бер елдан соң никахлашканнар. Алар гомер бу туган бистәләрендә эшлиләр. Хезмәт эшчәнлеген Алексеевск районындагы бер совхозда башлыйлар. Ире агроном, хатыны икътисадчы була. Аннан яшь гаиләне «Тельман» совхозына күчерәләр. Алексей Григорьевич партия райкомының икенче секретаре булып эшли. Галина Михайловна районның орлыкчылык инспекциясен җитәкли. Соңрак Алексей үз куллары белән төзегән өйгә күчәләр, бүген дә шунда яшиләр.
Галина һәм Алексей Солдатовлар: «Балалар үскәндә авыр булды. Аларны калдырырга урын булмады.Минем әнием, шулай ук күрше әби бик булыштылар. Ул чакта авылда кибет тә юк иде, азык-төлекне күрше авылга барып ала идек.»
Язмыш аларны төрле көтелмәгән сюрпризлар белән сынаган.Тормыш сынауларын бергә узганнар. Башта балалар, аннары оныклар үстергәннәр. Хәзер ул авырлыклар онытылып бара, диләр. Әлегә кадәр мәхәббәттә һәм татулыкта яши. Үзләрендәге гүзәл сыйфатларны балаларында да тәрбияләгәннәр. Солдатовлар гаиләсе халык арасында абруй казанган, аларны хөрмәт итәләр. Зур гаилә белән бергәләп очрашып утырырга, аралашырга яраталар. Алар өчен яшәүнең бөтен мәгънәсе ныклы тату гаиләдә гомер кичерү.
Гүзәл Зәйнакова, Сергей Павлухин.
