Ул хоккей карарга ярата, ил, республика яңалыклары белән кызыксына, күтәренке кәеф белән шат итеп елмая. Түбән Камада яшәүче Бөек Ватан сугышы ветераны Мирсияпов Азат Харис улы туган көнен билгеләп үтте. Аңа 94 яшь тулды. Ветеранны гомер бәйрәме белән котладылар, күкрәгенә «Җиңүнең 75 еллыгы» медален тактылар.
Бөек Ватан сугышы ветераны Азат Мирсияпов: «Балконнан шәһәрне күзәтәм, телевизордан хоккей карыйм, вакытым кызыклы үтә.»
Сугыш ветераны Азат Мирсияпов хоккей турында сәгатьләп сөйли ала. Казанның “Ак барсы” иң яраткан командасы.
Бөек Ватан сугышы ветераны Азат Мирсияпов:» командады кемнең ничек уйнавын беләм. Барлык уеннар да диярлек таныш миңа.»
Ә бу юлы телевизор урынына — ачык һавада концерт карый. «Нардуган»җыр һәм бию коллективы артистлары ветеран подъезды янында күңелле бәйрәм оештырды. Азат Мирсиповны 17 яшендә фронтка алалар. Башта укулар уза, утчылар гаскәрендә сугышка керә. Фронт юлын икенче Балтыйк буе фронты составында башлый. Берничә тапкыр яралана. Иң авыры -аягы яралану була. 19 яшьлек егет өчен сугыш 45 елның мартында тәмамлана. Азат Харис улы 2 дәрәҗә Ватан сугышы ордены иясе. Жуков һәм тагын берничә медаль белән бүләкләнгән. Аңа тантаналы шартларда Җиңүнең 75 еллыгы хөрмәтенә медаль тапшырылды.
Бөек Ватан сугышы ветераны Азат Мирсияпов: «9 май көнне мин исә килеш каршыларга тиеш, бәйрәмне көтеп яшим.»
Вахитов урамы, 45 йорт буенча җаваплы Людмила Усова: «Без барыбыз да аңа сугыштагы батырлыгы өчен бик рәхмәтле, аның белән горурланабыз.»
Сугыш ветераны олы яшьтә булуына карамастан, актив яшәү рәвешен алып бара. Күршеләре һәм туганнары белән аралашып яши. Якыннары — 3 баласы, 7 оныгы, шул кадәр үк оныкчыгы барысы да янәшәдә.
Раушания Сибатова, Булат Әбделманов.